A Asociación AGORA inicia obras de Eficiencia Enerxética en decembro 2022

A Asociación AGORA de Persoas con Discapacidade de Monforte de Lemos puxo en marcha este ano un proxecto de instalación de caldeiras e renovación de ventás, co fin de mellorar as instalacións do seu centro de día e as vivendas tuteladas para persoas con discapacidade.

Esta renovación ten por obxecto mellorar a eficiencia enerxética e a redución do consumo, como se recolle nunha das liñas dos ODS da Axenda 2030, na que se promove garantir o acceso a unha enerxía alcanzable, fiable, sostible e moderna para todas as persoas. As persoas beneficiarias deste proxecto son usuarias que acoden aos servizos que presta a entidade e que proceden dende diferentes concellos da comarca, como Monforte de Lemos e bisbarra, Pobra de Brollón, Bóveda, O Saviñao e Sober.

Para a mellora destas instalacións, a Asociación AGORA contou cun orzamento de 27.580,32 € procedentes dos fondos achegados polo 0,7% do IRPF a través de todas as persoas contribuíntes que marcaron o recadro 106 de Actividades de Interese Xeral para Fins de Carácter Social, máis coñecida por X Solidaria, que xestiona a Xunta de Galicia.

Tras levar a cabo estas obras, haberá unha mellora no aforro enerxético que repercutirá na calidade de vida das persoas usuarias, das vivendas e das instalacións do centro de día, xa que contarán cunhas instalacións máis eficientes e renovadas.