A Asociación AGORA Mellora a Eficiencia Enerxética e a Seguridade en 2024

Co obxectivo de mellorar tanto a seguridade como a eficiencia enerxética das nosas instalacións na Asociación AGORA acometemos importantes obras este verán. As actuacións realizadas inclúen a renovación de dúas portas, unha delas con sistema antipánico para garantir unha evacuación rápida e segura, así como a instalación de placas solares que permitirán o autoabastecimiento enerxético do centro de día.

Para a realización destas melloras, a Asociación AGORA contou co cofinanciamento da Xunta de Galicia a través dos fondos do 0,7% do IRPF que proveñen de marcar a caixa 106 de Actividades de Interese Xeral para Fins de Carácter Social, máis coñecida por X Solidaria e coa xestión de COGAMI.

Deste xeito, a Asociación AGORA continúa co seu compromiso de reducir o uso de combustibles fósiles e promover unha maior sustentabilidade ambiental nas súas instalacións.

A asociación leva anos traballando para mellorar as súas infraestruturas, sempre co obxectivo de ofrecer espazos máis confortables para as persoas usuarias e reforzar os seus programas e actividades. Estas iniciativas enmárcanse dentro dos Obxectivos de Desenvolvemento Sostible da Axenda 2030, aos que a Asociación AGORA está firmemente comprometida.

Isaac Rodríguez González, Presidente da Asociación AGORA, indica que “É moi importante a contribución da sociedade marcando a caixa 106 de Actividades de Interese Xeral para Fins de Carácter Social, xa que grazas a este xesto solidario os fondos do 0,7% do IRPF permite e facilita que as entidades poidan mellorar os seus programas, recursos e instalacións”.