A Asociación AGORA impulsa a renovación do equipamento informático e a creación de novos talleres no Centro de Atención Diurna neste ano 2026

Co obxectivo de seguir mellorando a calidade dos seus programas e servizos, a Asociación AGORA de Persoas con Discapacidade da Comarca de Lemos ven de desenvolver un proxecto de renovación do equipamento informático, dixital e do mobiliario do seu Centro de Atención Diurna, así como a posta en marcha de novos recursos destinados á formación e á mellora da autonomía das persoas participantes.

O investimento neste proxecto permitiu renovar os equipos informáticos empregados polos profesionais nas actividades que desenvolve a entidade, substituíndo aqueles que, debido ao paso do tempo e ao uso continuado, quedaron obsoletos. Deste xeito, dotouse a entidade de ferramentas máis modernas e con maiores prestacións, favorecendo unha atención máis áxil, eficiente e adaptada ás necesidades actuais.

Paralelamente, o proxecto contemplou a incorporación de novas ferramentas dixitais que complementarán as xa existentes na entidade. Estes recursos permitirán reforzar as competencias dixitais das persoas usuarias, ao tempo que facilitarán a implantación de terapias innovadoras que combinan as intervencións terapéuticas tradicionais co uso das novas tecnoloxías, contribuíndo a mellorar a estimulación cognitiva, a aprendizaxe e a participación activa das persoas con discapacidade.

Outra das actuacións foi a adquisición de novo mobiliario para as diferentes actividades que se desenvolven no Centro de Atención Diúrna, mellorando a funcionalidade dos espazos e o confort das persoas participantes. Así mesmo, incorporouse equipamento específico para a creación dun taller prelaboral de limpeza, unha nova iniciativa orientada á adquisición de habilidades laborais e á promoción da autonomía persoal e da inclusión sociolaboral das persoas participantes da área ocupacional.

Para a execución destas actuacións, a Asociación AGORA conta ca financiación procedente do 0,7% del IRPF, a través das achegas realizadas polas persoas contribuíntes que marcaron a casilla 106 de Actividades de Interés Xeral consideradas de Interés Social, coñecida como X Solidaria, uns fondos xestionados pola Xunta de Galicia que permiten impulsar proxectos de modernización e mellora nas entidades do terceiro sector.

A Asociación AGORA continúa así apostando pola innovación, a transformación dixital e a mellora dos seus recursos, promovendo servizos máis eficientes, inclusivos e adaptados ás necesidades das persoas con discapacidade, contribuíndo a incrementar a súa calidade de vida e as súas oportunidades de desenvolvemento persoal e social.